Óskar Hrafn sér að sér

Eftir síðustu færslu um skort á spilatíma hjá Róberti Orra sá Óskar að sér og síðan þá hefur Róbert byrjað alla leiki. Gegn KR í 2-0 tapi þar sem Róbert átti stórgóðan fyrri hálfleik. Í 2-1 sigri gegn Stjörnunni og 1-1 jafntefli gegn Val þar sem vill svo skemmtilega til að Róbert skoraði eina mark Blika. Í leiknum gegn Val var hann valinn maður leiksins, orðin sem fylgdu voru „Ótrúlega góður leikur hjá stráknum. Átti margar góðar tæklingar í vörninni og svo eru sendingarnar hans oft baneitraðar. Skoraði svo að sjálfsögðu gott mark." Hann var vissulega sofandi á verðinum í marki Valsmanna en mistök eru gerð til að læra af þeim og ef Vilhjálmur Alvar hefði bara dæmt rangstöðuna hefði þetta ekki gerst. Ef hann spilar næsta tímabil eins og síðustu þrjá leiki þá er atvinnumennskan líkleg og fátt sem gæti stöðvað hann í að komast á toppinn.